1Cor 9 | DOB | STEP | Geya'abo tomota sitootoo be siloinegu, nai silomulomugiyegu, ta esi wanuwa'i'isi 'aene 'abo'agu 'Inapwana Yesu 'ina toguinuwa 'ebweu, ga 'Inapwana nina ni'atu ya'itena, ga tetelina wate 'emiya yasimanena, ga waemisena,

1 Corinthians 9

Keliso 'ana tosimanao 'idi bubuna

1 Geya'abo tomota sitootoo be siloinegu, nai silomulomugiyegu, ta esi wanuwa'i'isi 'aene 'abo'agu 'Inapwana Yesu 'ina toguinuwa 'ebweu, ga 'Inapwana nina ni'atu ya'itena, ga tetelina wate 'emiya yasimanena, ga waemisena, 2 'enega wamwalatonigu 'abo'agu Yesu 'ana tosimana 'ai'aila. Ta 'aina tomota silomugiyegu 'abo'agu nigeya Yesu 'ana tosimana. Ta nigeya! 'Omi wada nuwa'i'isi 'abo'agu 'igu loguguyega 'ida 'Inapwana 'enaya 'imi emisa wasa'una.

3 'Enega gete nadigega yada ona'esa 'agu tolomugiyao 'ediya, 4 'aene 'abo'agu Keliso 'ana tosimana 'ai'ailao nadigega. Manuna taudi 'adi masula be 'adi bwasi wa'ebwa'ebwa'edi, 'enega 'ilobwenena be 'abo'agu wate nadigega wada 'ebwa'egu. 5 Ta wate taudi tosimanao nidi be 'ida 'Inapwana Yesu tasinao be Pita wate, 'idi sakowasi 'ediya mwanediyao si'au'ewedi ta wa'ita'i'isidi, 'enega 'abo'agu wate 'abo yada ai be mamwanegu 'ada sakosakowasi, 'ilobwenena be ma'iyagu wada 'ita'i'isima.

6 Ta 'abo'agu be Banaba nigeya sa'i 'emaya nadigega wada guinuwa'esa, manuna 'abo'ama tauma 'a'ita'i'isima 'ima guinuwa 'ana maisa 'ediyega.

7 'Ebweu enaida yada enaidemi be wada nuwanuwa manuna. Enaida nina gete: Tolosaiyao mane 'enega 'adi 'ita'i'ita silobalobadi? Gabemani 'ediyega, nai taudimo tuga 'ediyega? Wate 'ebweu 'igu enaida: 'Abo tai oine 'iasoi, ta sesoi 'ana tutaya, mwa'adega 'iabe uwana 'i'a'ani nai nigeya? 'Ebweu wate 'igu enaida: Mwa'adega 'abo tai ma ina baweyao 'i'ita'i'isidimo tuga ta nigeya 'ebweu 'ida ununa 'ina sagali manuna, to'ase 'ina 'ita'i'ita 'ana bobo'ana?

8 'Ebe'ita getedi 'ida 'asega, 9 ta Mosese 'ina loina ma'iyana sieleleleya, 'igwae, “'Abo bulumakau witi solanaya 'ipaipaisewa, 'ilobwenena be witi nidi 'ediyega 'ida 'e'ai.” Yaubada nigeya 'inuwanuwa sinabwana bulumakau manudi, 10 ta esi 'ionaona 'ina topaisewao 'abo'ada manuda. 'Enega loina gete 'isa'una be 'ada emisa be 'aene 'ima paisewa 'ediyega 'ama masula 'ada loba, nadigega taudi todauna be wate tosesoi siemiemisa be masula nidi 'idi bagulega sida 'e'ai.

11 'Abo'ama wate nadigega yaluyaluwami 'adi masula ni'atu 'adaunina 'emiya, 'enega 'ilobwenemi be bwalama 'adi masula wa'ebwa'ema. 12 Manuna mali tosimanao wae'enidi, 'enega 'ilobwenemi be wada e'enima wate, ta tuwa tuga 'a'alama'i'itana sinabwana, manuna 'abona nai 'aoopa'ala 'emiya be Keliso tetelina wasinali.

13 Ta wate Anuwa Tabu 'ana topaisewao wada nuwa'i'isidi. Taudi tomota 'idi 'ebwayadaitao 'ediyega 'adi masula silobaloba, ta wate totaliyao 'adi masula manuna yobai nidi 'ebe taliya 'enaya siunuunudi 'ediyega si'ewa'ewadi. 14 Yaubada 'ina loina gete nadigega be 'aene Yesu Keliso tetelina 'ana tosimanao 'adi masula sida lobadi 'idi paisewao 'ediyega.

15 Ta esi nigeya yaeonami be wae'enigu, ta wate geya'abo 'imi leta gete ya'eto'etoladi be 'aene wae'enigu. Geya'abo yaonaona masula manuna. 'Abo botanega yamwamwawasa, gete bobo'ana, manuna geya nuwagu be 'ami masula ya'ewadi. 16 'Igu paisewa gete tetela bobo'ana 'ana simana manuna, ta nigeya 'aene paisewa gete 'enega 'agu tupu yada loba, manuna gete 'igu paisewa tuga, ga 'ilobwenegu be yada guinuwa. Ta 'eguma yaguitoyasa 'iabe mwau sinabwana 'eguya 'iapwesa.

17 Yaubada 'agu loina gete 'isa'una 'igu paisewa manuna ta nigeya 'abo'agu taugu 'igu nuwenuwega, 'enega geya'abo maisa ya'ewa'ewa paisewa nina manuna. 18 Nate namo yagwausowala tuga manuna tetela bobo'ana 'emiya ya'ebwayadaita, ta esi geya'abo yanuwanuwa e'isa manuna. 19 Ta wate geya'abo tomota 'agu loina sisa'usa'u, ta esi tomota yauyaudi manudi yaguiguinuwa be yada 'etoseyedi. 20 'Enega yabubuna me Yudia 'idi bubuna nadigega be 'enega 'aene me Yudia yada lemedi, ta taudi Mosese 'ina loina simuliyena, 'abo ma'egwao 'amiyami yabubuna taudi nadigega be 'aene yalemedi, ta esi 'ateguyega geya'abo loina nina 'enaya yatagwatagwala. 21 Ta wate taudi Mosese 'ina loina nigeya simwalamwalatoni, 'eguma ma'egwao 'amiyami, yabubuna taudi nadigega be 'aene yalemedi, ta esi geya'abo 'agu loina Keliso 'enega yale'oale'oa. 22 Ta wate 'abo taudi 'idi emisa nenetana ma'egwao 'amiyami, yabubuna taudi nadigega be 'aene yalemedi. 'Enega tomota maibo'adi ma'egwao manudi yatoo waiwai be yapanaitedi be 'enega 'aidi 'ediyega 'etoseyana sida loba Keliso 'enega. 23 'Igu paisewa gete tetela bobo'ana manuna, be 'aene 'omi ma'egwao 'etoseyana tada loba tetela nina 'enega.

24 Ta wada nuwa'i'isi 'abo epili 'enaya maibo'adi siepiepili, ta esi 'ebweuna namo 'ediyega 'inugana, 'enega 'ilobweneda be tatoo waiwai be tada nugana.

25 Ta yaisigedi taudi bale'uya sitoo waiwai, ta sie'alama'i'itana 'idi toona 'enega, be 'aene pali sawasawalina sida loba, ta esi 'abo'ada tatoo waiwai be pali miyamiya atayana galewega tada loba.

26 Gete manuna yapili waiwai, nai yaetapewa waiwai, ta geya'abo yaetaetapewa besobeso. 27 'Enega bwalagu yaloina pa'alena be 'enega geya'abo yada bubuna besobeso, 'abona nai 'igu loguguya mali tomota 'ediya mulinaya 'abo'agu yabebe'u.